डान्सबारमा के भयो ?

दिन एक

अनुसन्धानकर्ताले डान्सबारको कामसम्बन्धी जानकारी लिन गरिएको अध्ययनको पहिलो दिन रामले साँझ ५ बजे डान्सबार खोले। धेरैजस्तो कर्मचारीहरू साँझ ६ बजे काममा आइपुगे। अरू कर्मचारीहरू काठमाडौंको धेरै टाढा रहेका स्थानबाट आउने भएकाले व्यस्त ट्राफिकको कारण साँझ ७ नबजी आइपुग्दैनन्। डान्सबारभित्र विभिन्न कामका लागि भिन्नभिन्नै कर्मचारी राखिएका हुन्छन्। अनुसन्धानकर्ताहरू डान्सबार गएको साँझ पुरुष कर्मचारीले बारका कामहरू गरे भने महिला कर्मचारीहरूले सोफा र टेबल सफा गरे। अन्य महिला कर्मचारीहरूले चाहिँ सोफामा बसेर धुम्रपान र मध्यपान गरे, टिकटक हेरे र ग्राहकहरू नआउन्जेलसम्म अन्य सामाजिक सञ्जाल चलाएर बसे ।

राति ९:३० बजे झण्डै ४० वर्ष उमेर कटेका पाँचजना पुरुष ग्राहकहरूको एक समूह त्यो स्थानमा प्रवेश गर्यो। तिनीहरू भित्र पस्ने बित्तिकै एकजना ग्राहकले एउटी महिला कर्मचारीको कम्मरमा हात राखे र उनलाई अँगालो हालेर ओठमा चुम्बन गरे। त्यो समूहको अर्को सदस्यले अर्की महिला कर्मचारीलाई समाते र तिनीहरू नाच्न थाले। एकजना ग्राहकले रामलाई हाई-फाइभ गरेर आफूहरू एकअर्कासँग चिनिरहेको जस्तो व्यवहार गरे। त्यसपछि राम नाच्नको लागि स्टेजमा गए।

पाँचजना पुरुषहरू स्टेजको नजिक राखिएको सोफाको पङ्क्तिमा बसे र उनीहरूले बियर अर्डर गरे। एउटी महिला कर्मचारीले ग्राहकहरूलाई एउटा बियर खन्याइन् र त्यसपछि आफ्नै लागि पनि बियर खन्याएपछि ती ग्राहकहरूको बीचमा आफ्नो शरीर खुम्च्याएर बसिन्। केही समयपछि उनी स्टेजमा गएर नाच्न थालिन्।

यो समूहका ग्राहकहरू प्रायः सेवानिवृत्त प्रहरी वा सेनाका कर्मचारीहरू थिए। एक पटक सङ्गीत त्यति चर्को नहुँदा एकजना ग्राहकले ‘म आर्मीको मान्छे हुँ र उहाँ प्रहरीमा हुनुहुन्छ!’ भन्दै चर्को स्वरमा महिला कर्मचारीको अगाडि आफ्नो साथीलाई जिस्किँदै सेल्युट गर्दै अभिवादन गरेको सुनिएको थियो। समूहमा रहेका एकजना ग्राहकले मदिरा र धुम्रपान केही पनि सेवन गरेनन् तर उनी आफ्ना साथीहरूसँग बस्न मात्रै आएका जस्तो लागिरहेको थियो। समूहका अन्य दुई ग्राहकहरू भने रक्सी सेवन र धुम्रपान गरिरहेका थिए तर उनीहरू शान्त देखिन्थे। समूहका दुईजना सदस्यले मादक पदार्थ सेवन गरेर मात्तिए झैं गरिरहेका थिए र यी दुई ग्राहकहरूले पछि नाच्ने र महिला कर्मचारीलाई छुने र चुम्बन गर्ने गरिरहेका थिए।

तीनजना महिला कर्मचारी आएर पाँचजना ग्राहकहरूसँग बसे। केही समयपछि अर्की महिला कर्मचारी पनि उक्त समूहमा सामेल भइन्। उक्त कर्मचारी त्यस डान्सबारमा काम गर्ने नयाँ कर्मचारी जस्तो देखिन्थिन् किनभने उनको अर्को कर्मचारी साथीले उनलाई पिउन र ग्राहकहरूसँग सहज हुन इसारा गर्दै थिइन्।

केही समयपछि एकजना ग्राहक डान्स फ्लोरको स्टेजमा गएर एकजना महिला डान्सरसँग नृत्य गर्न थाले। उनीसँग नाच्दै गर्दा ग्राहकले लगातार उनको शरीर छोइरहे। एक समयमा उनले उनीलाई भित्तामा धकेले र उनको ओठ, गाला, घाँटीमा जबरजस्ती चुम्बन गर्दै थिए र उनको शरीर स्पर्श गर्दै थिए। त्यति बेलै रामले उनीहरूका लागि स्टेजमा प्रस्तुति दिए। नृत्य सकेपछि रामले महिला कर्मचारीहरू नाचिरहेका बेला ग्राहकले दिएका टिप्स रकम सङ्कलन गरे।

ग्राहकहरू नेपालको पहाडी क्षेत्रबाट आएका थिए र उनीहरूले मुख्य रूपमा नेपाली गीत बजाउन अनुरोध गरे। तिनीहरू महिला कर्मचारीलाई छामछुम गर्दै नाचिरहे। तिनीहरू कहिलेकाहीं नाच्दै गर्दा एकजना ग्राहकले धेरै महिला कर्मचारीहरूलाई पालैपालो आफ्नो अङ्गालोमा राखे। यस्तॊ गर्दा ती महिला कर्मचारीहरू रिसाए र उनीहरूलाई त्यसो नगर्न आग्रह गरे। यद्यपि उनले बेवास्ता गर्दै तिनीहरूलाई बसेको ठाउँबाट उठाउने र मजाक गर्दै सबैलाई आफ्नो बाइसेप्स देखाए। एकजना ग्राहक मौका मिलाएर महिला कर्मचारीको कानमा केही कानेखुसी गर्थे र उनले आफ्नो टाउको हल्लाउथिन्। यसबाट उनले ति पुरुषले भनेको कुरामा सहमत भएको थाहा हुन्थ्यो।

लगभग ४० वर्षको अर्का ग्राहक एक्लै डान्सबारमा प्रवेश गरे। उनले एकजना कर्मचारीसँग कुरा गरे र अर्को कर्मचारीलाई बोलाउन अनुरोध गरे। ति महिला कर्मचारीले पनि भनेअनुसार बोलाइन् र चेन्जिङ रुमबाट एकजना कर्मचारीलाई आइन् अनि ति व्यक्तिले उनलाई एउटा उपहार दिए, अँगालो हाले र त्यस स्थानबाट बाहिर गए।

एक पटक एकजना ग्राहकले हामी (अनुसन्धानकर्ताहरू) लाई हेरे र हामी नयाँ कर्मचारी हौं कि भनेर सोधे। रामले होइन भन्दै हामी संस्थाबाट आएका र अनुसन्धानका लागि आएका भन्ने कुरा बताए। पाँचजना ग्राहकहरू राति लगभग ११:४५ बजे त्यस स्थानबाट निस्किएर गए। त्यहाँबाट निस्किने समयमा एकजना ग्राहकले हामी भएको ठाउँमा आएर हामीले उनीहरूले नाचेको आनन्द लियौं कि लिएनौं भनी सोधे। अर्का ग्राहक उनीसँगै हामी भएको ठाउँमा आएर हामीलाई रमाइलो पारामा ‘नमस्ते!’ भनेर अभिवादन गरे। त्यसपछि उनीहरूका साथीले उनीहरूलाई हप्काए र हामीलाई ‘रक्सीले मातेका मान्छेहरूले अरूलाई दुख दिनुहुन्न!’ भनेर एक्लै बस्न भने। उनले आफ्ना साथीहरूलाई हामी एउटा संस्थाबाट आएका हौँ भनी कानेखुसी गरे र त्यसपछि उनीहरू सबैजना त्यस ठाउँबाट गए।

डान्सबारको मुनि रहेको रेस्टुरेन्ट तथा बारमा वेट्रेस र कुकको रूपमा काम गरिरहेका दुईजना १८ वर्ष मुनिका युवतीहरू राति लगभग ११ बजे डान्सबारमा प्रवेश गरे। उनीहरूले काउन्टरमा रहेका पुरुष कर्मचारीसँग खुसुक्क कुरा गरे र उनले रामलाई उनीहरूसँग कुरा गर्न बोलाए। तिनीहरूले रामसँग कुरा गरे तर चर्को सङ्गीतका कारण अनुसन्धानकर्ताहरूले उनीहरूले बोलेका कुरा सुन्न सकेनन्। एउटी केटी केही मिनेटका लागि तल गइन् र रामसँग केही मिनेट कुराकानी गर्दै बसेका लगभग १९-२० वर्षका एकजना युवकसँग उनी फेरी फर्केर आइन्। एउटी केटी कसैसँग कुरा नगरिकन डान्सबारमा ग्राहक र नृत्य प्रस्तुति हेरिरहिन्। अर्की केटी र एक जवान पुरुष त्यहाँबाट गए र १५ मिनेटपछि फर्केर आए। ती केटीहरू राति लगभग ११:४० बजे डान्सबारबाट निस्किएर गए। अनुसन्धानकर्ताले रामलाई ती केटीहरूको बारेमा सोध्दा उनले केटीहरू अनलाइन बाइक र ट्याक्सी सेवा पठाओका लागि आएको बताए तर अनुसन्धानकर्ताहरूलाई केटीहरू आएर बसेको घटना असामान्य लाग्यो।

सो समूह त्यहाँबाट गइसकेपछि दुईजना महिला कर्मचारीले पाँचैजनाका लागि पर्याप्त केटीहरू नभएकाले ग्राहकहरू चाँडै त्यहाँबाट गएको भनी एक अर्कासँग कुरा गरिरहेका थिए। हामीले महिला कर्मचारीहरूलाई सोफाहरू पुन: मिलाउन मद्दत गर्‍यौँ। एकजना महिला कर्मचारीलाई अर्कै एकजना ग्राहकको फोन आयो। उनले त्यस व्यक्तिलाई डान्सबारमा आउन निम्तो गरिरहेकी थिइन्। उनीसँग केही मिनेट कुरा गरेपछि उनले फोन रामलाई दिइन्। रामले उक्त ग्राहकलाई ज्वाइँ भनेर सम्बोधन गरे। त्यसपछि रामले हामीलाई ‘तपाईंहरू देख्न सक्नुहुन्छ कि हामी ग्राहकहरूसँग आदरपूर्वक राम्रो सम्बन्ध कायम गर्छौँ किनभने उहाँ हाम्रो एकजना शेयरधनीको साथी हुनुहुन्छ।‘ भनेर बताए।  

त्यसपछि डान्सबारमा अन्य कुनै पनि ग्राहक आएनन्। महिला कर्मचारीहरू रक्सी पिउँदै थिए र धुम्रपान गरिरहेका थिए र केही समयपछि मध्य राति लगभग १२:४५ बजे तिनीहरू खाना खान गए। डान्सबारको एउटा सानो कर्मचारीको भान्छामा रातिको खाना तयार गरिएको थियो। खाना खाइसकेपछि कुनै पनि ग्राहक आएनन्। रामले अझ एक घण्टा पर्खे र त्यसपछि डान्सबार बन्द गरे। उनले ट्याक्सी बोलाए र केटीहरूलाई जान भने। उनले हिसाबकिताबको काम गरे र उनले हिसाब गर्न अर्को साझेदारसँग बस्ने कुरा हामीलाई बताए। त्यसपछि अनुसन्धानकर्ताहरू त्यहाँबाट गए।

दिन दुई

दोस्रो दिन पनि डान्सबार साँझ ५ बजे नियमित समयमा नै खुल्यो। राति ९:३० बजे चारजना ४० वर्षभन्दा माथिका ग्राहकहरूको समूह सुरुमा डान्सबारमा प्रवेश गर्यो। अघिल्लो दिनको ठ्याक्कै विपरित कुनै पनि ग्राहकले महिला कर्मचारीलाई अभिवादन गरेनन् वा अँगालो हालेनन्। बरु तिनीहरूले सोफामा बसेर सङ्गीतको आनन्द लिइरहेका थिए। फेरी उनीहरू आएको केही समयपछि राम स्टेजमा गएर नाच्न थाले।

ती ग्राहकहरू मूलतः नेपालको तराई (दक्षिणी) क्षेत्रबाट आएका जस्तो देखिन्थे र तिनीहरूले हिन्दी भाषाका गीतहरू बजाउन अनुरोध गरे। समूहका दुई सदस्यहरू बसेर रक्सी पिइरहेका थिए भने अर्को एकजना सदस्य भने मदिरा पिउँदै महिला कर्मचारीसँग नृत्य गरे। एकजना ग्राहकले एउटी महिला कर्मचारीलाई त्यसरी अभिवादन गरे मानौं उनले ति महिलाई पहिले भेटेका थिए। उनी उनको नजिक पुगिन् र आफ्नो लागि रक्सी किन्न अनुरोध गरिन्। उनीहरू सँगै बसेर बियर पिए। उक्त ग्राहक यी महिला कर्मचारीसँग सहज देखिन्थे र पछि उनलाई समाते र नाचे, चुम्बन गरे र अँगालो हाले। उनीहरूसँगै अर्की महिला कर्मचारी पनि बसिरहेकी थिइन् तर उनको अनुहारको अभिव्यक्ति र शरीरको हावभावले उनी त्यो समूहको हिस्सा हुन नचाहेको जस्तो देखिन्थ्यो।

त्यसपछि सो ग्राहकले अर्को प्रस्तुतिका लागि एउटा गीत अनुरोध गरे र उनीसँग बसिरहेकी र नाचिरहेकी महिला कर्मचारीले स्टेजमा गएर गीतमा प्रस्तुति दिन थालिन्। यद्यपि उक्त ग्राहक उनको प्रस्तुतिबाट असन्तुष्ट थिए र उनलाई उनी नाचिरहेको तरिका परिवर्तन गर्न आग्रह गरे। उनी म्युजिक भिडियोमा मूल डान्सरले प्रस्तुति दिइएको गीतसँग धेरै मेल खाओस् भनेर उनले महिला कर्मचारीलाई भुइँमा बस्न भने। उक्त महिला कर्मचारी अनुरोध गरिएअनुसार भुइँमा बसिन् र आफ्नो प्रस्तुति जारी राखिन्। यसो गर्दा ग्राहक प्रसन्न भए।

डान्सबारका एकजना शेयरधनी पछि आए। उनले हामीलाई अभिवादन गरे र त्यसपछि बारको छेउमा उभिएर त्यहाँ भइरहेका कुराहरू हेरे।

चारजना ग्राहकको समूह राति लगभग १० बजेतिर डान्सबारबाट निस्किएर बाहिर गयो। त्यसको लगत्तै करीब ३० वर्ष उमेर पुगेका दुईजना पुरुष ग्राहकहरू आइपुगे। एकजना महिला कर्मचारी तुरुन्तै नजिक गइन् र एकजना ग्राहकलाई अभिवादन गरिन्। त्यसपछि उनी तिनीहरूको छेउमा बसिन् र तिनीहरू दुवैका लागि बियर अर्डर गरिन्। उनी ती ग्राहकहरूमध्ये एकजनासँग निकै नजिक देखिन्थिन्। दुबैजना ग्राहकहरू रक्सी पिइरहेका थिए र नृत्य प्रस्तुतिको आनन्द लिइरहेका थिए। पछि अर्की महिला कर्मचारी पनि उनीहरूसँग सामेल भइन्। ती दुईजना ग्राहकहरू कर्मचारीसँग बेलाबेलामा कुरा गरिरहेका थिए र उनले टाउको हल्लाएर तिनीहरूलाई जवाफ दिइरहेकी थिइन्। चर्को सङ्गीतका कारण उनीहरूको कुराकानी सुन्न सम्भव थिएन। ग्राहकहरूले रक्सी पिए तर उनीहरू शान्त देखिन्थे। उनीहरूले नृत्य प्रस्तुतिको आनन्द लिइरहेका थिए तर उनीहरू आफैले नृत्य भने गरेनन्। ति ग्राहकहरू ११:३० बजेतिर डान्सबारबाट निस्किए।

त्यसपछि कुनै पनि ग्राहकहरू त्यो डान्सबारमा आएनन्। कर्मचारीले खाना खाइसकेपछि रामले लगभग १२ बजे डान्सबार बन्द गर्ने निर्णय गरे। उनले कर्मचारीहरूलाई उनीहरूका घरसम्म छोड्न एउटा ट्याक्सी बोलाए।